Zëdhënësi i BE-së, Peter Stano, po deklaron se në javët e ardhshme, Lajçak sërish mund t’i ftojë në takim Besnik Bislimin e Petar Petkoviqin.
Sipas tij, palët ende nuk kanë arritur t’i kapërcejnë dallimet lidhur me dinarin.
“Më 4 prill, emisari i BE-së, Miroslav Lajçak, priti në takim kryenegociatorët e Kosovës dhe Serbisë për një raund tjetër diskutimesh mbi një zgjidhje të përkohshme për të adresuar implikimet e rregullores së fundit të Bankës Qendrore të Kosovës për paratë e gatshme për komunitetin serb të Kosovës. Ky ishte tashmë takimi i katërt për këtë temë në pesë javët e fundit. Meqenëse, palët nuk mund të kapërcenin dallimet e tyre në propozimet e tyre origjinale, Lehtësuesi i BE-së paraqiti ide mbi të cilat mund të bazohej një zgjidhje e përkohshme”, tha Stano për Rtv21.
Ai më tutje deklaroi se duhet të arrihet një marrëveshje pa vonesa.
“U ra dakord me palët që diskutimet e mëtejshme do të bazohen në idetë e paraqitura nga BE-ja. Emisari i BE-së planifikon të ftojë Palët sërish në javët e ardhshme. Le të kujtojmë se një zgjidhje e përkohshme duhet të arrihet pa vonesa të mëtejshme dhe duhet të negociohet një zgjidhje e përhershme në lidhje me zbatimin e Marrëveshjes në rrugën e normalizimit”, tha Stano.
