Kim Yo Jong, motra e fuqishme e udhëheqësit të Koresë Veriore, Kim Jong Un, tha se vendi i saj do të vazhdojë që të ndërtojë fuqi ushtarake dërrmuese dhe më të fuqishmen për t’i mbrojtur sovranitetin e shtetit dhe paqen rajonale, raportoi të mërkurën agjencia shtetërore e lajmeve atje, KCNA.
Sipas saj, një varg ushtrimesh ushtarake të ushtrisë amerikane në rajon këtë vit, duke filluar me ushtrimet me zjarr të vërtetë që u kryen me “banditët ushtarakë kukulla të Koresë Jugore”, po e çojnë mjedisin e sigurisë rajonale drejt një trazire të rrezikshme, raporton agjencia “Reuters”.
“Ne do të vazhdojmë që të ndërtojmë fuqi ushtarake dërrmuese dhe më të fuqishmen për t’i garantuar sovranitetin tonë, sigurinë dhe paqen rajonale” – citohet të ketë thënë zonja Yo Jong.
Ushtritë e ShBA-së dhe Koresë Jugore kanë kryer një varg ushtrimesh të nivelit dhe intensitetit më të lartë muajve të fundit sipas një zotimi të udhëheqësve të të dyja vendeve për ta ngritur gatishmërinë ushtarake kundër kërcënimeve ushtarake të Koresë Veriore.
Rreth 100 aeroplanë ushtarakë kryen ushtrime dyjavore këtë muaj, sipas ushtrisë së Koresë Jugore.
Koreja Veriore thotë se ushtrimet ushtarake të ShBA-së janë përgatitje për një luftë bërthamore kundër saj. Uashingtoni dhe Seuli thonë se ushtrimet janë mbrojtëse për nga natyra dhe kryhen rregullisht për ta mbajtur gatishmërinë në nivel.
