Grupi Parlamentar i Lidhjes Demokratike të Kosovës i ka dorëzuar dje zyrtarisht kërkesën Kryesisë së Kuvendit, për vendosjen e shtatores së Leotrim Ahmetit në oborrin e Kuvendit të Kosovës, raporton Express.
Lajmin e ka bërë të ditur deputeti Avdullah Hoti, i cili e ka publikuar kërkesën në llogarinë e tij në Facebook.
7-vjeçari u vra me 11 shtator 1998, nga shpërthimi i granatave të forcave serbe në oborrin e shtëpisë së familjes Ahmeti në Rrezallë të Skenderajt, dhe copat e granatës ranë mbi fëmijët e nënës Shukrie Ahmeti, gruas së Malush Ahmetit, dëshmorit të Kosovës.
Hoti ka thënë se vendosja e shtatores së njejtë, në oborrin e Kuvendit të Kosovës do të shërbejë si një mënyrë e denjë për të memorializuar të kaluarën e rëndë të Kosovës dhe për të përkujtuar sakrificën e rreth 1 mijë fëmijëve të vrarë gjatë luftës së fundit.
“Pas, marrjes së pëlqimit të familjes Ahmeti, ne këkojmë nga autorietet e Kuvendit të Kosovës që të ndërmarrin hapat e nevojshëm për të realizuar këtë kërkesë dhe për të kujtuar përgjithmonë historinë e rëndë të kombit tonë. Gjithashtu, dëshirojmë të informojmë publikun se do të angazhohemi që e njëjta shtatore të vendoset edhe në kryeqendrat e vendeve të rëndësishme perëndimore”, ka shkruar Hoti.
