Kryeministri Albin Kurti, i shoqëruar nga ministri i Kulturës, Rinisë dhe Sportit, Hajrulla Çeku e kanë vizituar familjen Emra me rastin e vdekjes së akademikut, profesorit dhe piktorit, Tahir Emra, i njohur edhe si një prej pionierëve të artit pamor në Kosovë.
“Në këtë vizitë për ngushëllime, në të cilën u mirëprit nga familjarët e të ndjerit, kryeministri Kurti lartësoi figurën e shquar të piktorit Tahir Emra, si një akademik që do të inspirojë edhe brezat e ardhshëm. Në librin e kujtimeve, kryeministri shkroi se vepra e tij do të rrojë e frymëzojë brezat pas nesh e artistë edhe jashtë nesh”, thuhet në njoftimin e Zyrës së Kryeministrit.
Kurti u ka shprehur ngushëllime familjarëve të Tahir Emrës, miqve të tij si dhe komunitetit kulturor.
“Piktor akademik, profesor i dashur, artist patriot, njeri i vendit e popullit tonë, vepra e të cilit do të rrojë e frymëzojë brezat pas nesh e artistë edhe jashtë nesh. Tahir Emrën e mbajmë fort në kujtesë të gjithë. Me mall dhe pikëllim, me nderime dhe admirim”, shkroi Kurti në librin e kujtimeve.
