Shefi i diplomacisë evropiane, Josep Borrell, akuzoi sot presidentin rus, Vladimir Putin, se “po përgatitet për një luftë të gjatë” dhe paralajmëroi për mundësinë e zgjerimit të konfliktit në Lindjen e Mesme në Liban, pas kërcënimit të Hezbollahut libanez, i cili mbështetet nga Irani, për sulm ndaj Qipros.
Sa i përket Ukrainës, Borrell, pas mbërritjes në takimin e ministrave të jashtëm të BE-së në Luksemburg, tha se do të paraqesë një propozim se si të shmanget që ndonjë shtet anëtar të bllokojë përdorimin e të ardhurave nga fondet e ngrira financiare ruse për të mbështetur Ukrainën. Ai shtoi se duhet të rritet mbështetja e BE-së për Ukrainën.
“Ne kemi të ardhura nga pasuritë e ngrira dhe duhet të gjejmë mënyrën për t’i përdorur ato, duke shmangur çdo bllokim,” tha Borrell për gazetarët.
Ai shtoi se kësti i parë i parave do të arrijë javën e ardhshme, ndërsa i dyti disa muaj më vonë.
“Nuk mund të bëhen rezerva nga këto para. Ato duhet të përdoren. Ne kemi një procedurë ligjore për të shmangur çdo bllokadë,” tha Borrell.
Ai vlerësoi se është e qartë se presidenti rus Vladimir Putin “po përgatitet për një luftë të gjatë” pasi, siç tha ai, pas mbajtjes së samitit në Zvicër, Putin “udhëton në Korenë e Veriut, udhëton kudo ku mund të sigurojë armë”. Ai shtoi se gjatë takimit të sotëm të krerëve të diplomacive të BE-së do të diskutohet edhe për situatën në Lindjen e Mesme dhe në Rripin e Gazës dhe theksoi se ai dhe komisari Janez Lenarčič kanë vënë në dukje se dërgimi i ndihmave humanitare në Gazë është bërë i pamundur.
“Rreziku që kjo luftë të ndikojë në jug të Libanit dhe të përhapet, çdo ditë e më shumë rritet. Jemi shumë të shqetësuar,” paralajmëroi Borrell.
Shefi i diplomacisë evropiane theksoi se gjatë takimit të Këshillit të BE-së për Punë të Jashtme në Luksemburg do të diskutohet edhe për situatën në Gjeorgji.
“Dyert janë të hapura që Gjeorgjia të bëhet anëtare e Bashkimit Evropian, por nëse qeveria vazhdon të ndjekë të njëjtën rrugë, vazhdon të bëjë atë që po bën, këto dyer do të mbyllen. Dhe populli gjeorgjian do të paguajë pasojat,” paralajmëroi Borrell.
