Kryeministri Edi Rama deklaroi sot se si rezultat i rritjes ekonomike të vendit, po shikohet mundësia që bonusi i pranverës për pensionistët të jetë i përvitshëm.
“Bonusi i fundvitit, që është një bonusi tradicional, edhe pse tradicionalisht ka qenë fillimisht fare simbolik, pastaj është rritur, por gjithsesi asnjëherë nuk ka qenë në masën e këtij viti dhe pastaj me një tjetër bonus që do të jepet në pranverë, pikërisht si rezultat i mundësive të rritura të ekonomisë dhe që ne duam të kthehet në një mundësi të vitpërvitshme”, u shpreh Rama.
Gjatë një takim me ish-punonjës të Policisë së Shtetit, Gardës, AMP-së dhe Shërbimit Zjarrfikës, Rama theksoi se qeveria është në procesin e përgatitjes së një rritje të fondit të pensioneve.
“Ndërsa nga ana tjetër ne jemi në procesin e përgatitjes së një rritjeje të fondit të pensioneve qoftë duke rritur të ardhurat nga siguria shoqërore, por dhe qoftë duke rritur buxhetin në dispozicion të pensioneve, dhe këtu kam parasysh të pensioneve të çdo muaji. Besoj se për të gjithë ata që bëjnë llogari dhe nuk flasin kot, pensionistët janë kategoria më e kthjelluar nga pikëpamja e llogarive, është e qartë se bëhet fjalë për një numër shumë të madh pensionistësh dhe për shifra shumë të mëdha për mundësitë dhe buxhetin e vendit tonë. Kjo nuk vlen vetëm për vendin tonë, por edhe për vend të zhvilluar, që kur vjen puna tek pensionet janë një sfidë më vete”, tha Rama.
Kreu i qeverisë theksoi më tej se “qoftë bonuset, qoftë plani i mundshëm i rritjes graduale të pensioneve në mënyrë të përmuajshme, nuk do të ishin dot diskutime që do t’i bënim deri përpara jo shumë kohësh. Sot ekonomia ka filluar të na i kryejë këto mundësi”.
