ZKM ka njoftuar se Qeveria në detyrë në një mbledhje elektronike ka miratuar vendimin që ta aprovojë kërkesën e Ministrisë së Mbrojtjes për dërgimin e kontingjentit të FSK’së në një operacion humanitar në Shqipëri.

Mjetet financiare për dërgimin e FSK’së atje do të sigurohen nga buxheti i Kosovës.

“Qeveria në detyrë e Republikës së Kosovës ka zhvilluar mbledhje elektronike, në të cilën ka shqyrtuar dhe miratuar vendimin për aprovimin e Kërkesës së Ministrisë së Mbrojtjes për dërgimin e Kontingjentit të FSK-së në operacion humanitar në Republikën e Shqipërisë. Nga vendimi i kësaj mbledhjeje të 259-të të Qeverisë, mjetet financiare për dërgimin e Kontingjentit të FSK-së në operacion humanitar, sigurohen nga Buxheti i Republikës së Kosovës.”

Bëhet fjalë për një operacion humanitar të kërkim-shpëtimit në “Qafën e Burrelit”, Bashkësia Klos.

“Ministria e Mbrojtjes, mbi bazën e objektivave dhe planifikimeve strategjike për zgjerimin e kapaciteteve dhe vënies në detyrë të këtyre kapaciteteve është e përgatitur të mbështetës Shqipërinë me një Kontingjent për nevojë humanitare, përkatësisht operacionin humanitar kërkim shpëtim, në vendin e quajtur “Qafën e Burrelit”, Bashkia Klos. Kjo mbështetje është në kuadër të partneritetit strategjik me shtetet mike e në veçanti me Shqipërinë, me këtë rast për mbështetje të autoriteteve të shtetit shqiptar.”