Kandidati i PDK-së për kryeministër, Bedri Hamza, ka uruar Policinë e Kosovës për të arriturat e vazhdueshme.
Në 25 vjetorin e themelimit të Policisë së Kosovës, ai ka thënë se Kosova është krenare me këtë institucion.
Në profilin e tij në “Facebook”, Hamza ka shkruar pjesëtarët e kwtij institucioni nuk kanw hezituar në asnjë moment që ta rrezikojnë edhe jetën e tyre për rend dhe ligj.
“Më 6 shtator 1999, 25 vjet më parë, 176 kadetë e filluan trajnimin në kushtet e një shoqërie të lirë e demokratike si gjenerata e parë e Policisë së Kosovës. Kjo ditë vendosi themelet e një prej institucioneve më të mira dhe profesionale të zbatimit të ligjit në rajon. Gjeneratë pas gjenerate, Policia e Kosovës u rrit dhe u zhvillua nga vajzat dhe djemtë më të mirë të vendit, të cilët nuk hezituan në asnjë moment që ta rrezikojnë edhe jetën e tyre për rend, ligj e mbrojtje të pronës dhe të gjithë qytetarëve të Kosovës, pa dallime. Ky jubilar shënon të arritura të vazhdueshme, por zgjon edhe momente të dhimbjes e krenarisë për policët e rënë në krye të detyrës. Me respekt të thellë, i përgëzoj të gjithë pjesëtarët e Policisë së Kosovës dhe familjet e tyre, veçanërisht familjet e të rënëve në krye të detyrës që shërbejnë si model i përkushtimit për atdheun. Kosova është krenare me ju!”, ka shkruar Hamza.
